ក្រុមអ្នករត់តាក់ស៊ីដាក់ពាក្យសុំធ្វើបាតុកម្មប្រឆាំងទង្វើរបស់គយពីប៉ោយប៉ែតទៅទីរួមខេត្តបន្ទាយមានជ័យ
04-June-2016 | ដោយ មែន កំសត់
បន្ទាយមានជ័យ ៖សមាជិកបណ្ដាញអ្នករត់តាក់ស៊ីសន្តិភាពនៅក្រុងប៉ោយប៉ែតចំនួន៤នាក់ តំណាងឲ្យអ្នករត់តាក់ស៊ីជាង៥០នាក់ នៅរសៀលថ្ងៃទី២មិថុនាម្សិលមិញ បានដាក់លិខិតស្នើសុំទៅសាលាខេត្តបន្ទាយមានជ័យ អនុញ្ញាតច្បាប់ធ្វើបាតុកម្មដោយសន្តិវិធី ដើម្បីតវ៉ានឹងមន្ត្រីគយដាក់ប៉ុស្តិ៍ត្រួតពិនិត្យតាមផ្លូវជាតិលេខ ៥ ពីក្រុងប៉ោយប៉ែត ទៅទីរួមខេត្តបន្ទាយមានជ័យ។
អ្នករត់ តាក់ស៊ីអះអាងថា មន្ត្រីគយដាក់ប៉ុស្តិ៍ត្រួតពិនិត្យ គាបសង្កត់ប្រជាពលរដ្ឋ ហើយធ្វើឲ្យប៉ះពាល់ដល់របរដឹកជញ្ជូនរបស់ពួកគាត់រៀងរាល់ថ្ងៃ។
ប្រធានក្រុមអ្នករត់តាក់ស៊ីបណ្ដាញសន្តិភាពក្រុងប៉ោយប៉ែត លោក គង់ វិសាល ឲ្យដឹងនៅថ្ងៃទី២ មិថុនាថា មូលហេតុដែលពួកគេស្នើសុំធ្វើបាតុកម្មនេះ ដោយសារកន្លងមក មន្ត្រីគយនិងរដ្ឋាករខេត្តបន្ទាយមានជ័យ ដាក់ប៉ុស្តិ៍ត្រួតអនាធិបតេយ្យតាមផ្លូវជាតិលេខ៥ ពីក្រុងប៉ោយប៉ែត ទៅទីរួមខេត្តបន្ទាយមានជ័យ។ លោកអះអាងថា មន្ត្រីគយបង្ខំពួកគេឲ្យបង់ប្រាក់ម្នាក់ប្រមាណ១៥០ដុល្លារ សហរដ្ឋអាមេរិករៀងរាល់ខែ ហើយប្រសិនបើរថយន្តណាមិនបានបង់ប្រាក់ទេ គឺមន្ត្រីគយនឹងឃាត់រថយន្តទុកមិនឲ្យដឹកទំនិញឡើយ។
លោក គង់ វិសាលបាននិយាយថា៖ ខ្ញុំសូមអំពាវនាវ និងទាមទារសិទ្ធិសេរីភាពក្នុងការដឹកជញ្ជូនឲ្យមានភាពយុត្តិធម៌ ដោយកុំឲ្យមន្ត្រីគយនិយាយថា ពួកខ្ញុំដឹកអីវ៉ាន់គេចពន្ធ ព្រោះអីវ៉ាន់ដែលខ្ញុំដឹកកន្លងមកជាទំនិញស្របច្បាប់ទេ។
ឆ្លើយតបនឹងបញ្ហានេះ ប្រធានគយ និងរដ្ឋាករខេត្តបន្ទាយមានជ័យ លោក ឆែ សុធា ពុំមានប្រតិកម្មអ្វីឡើយទេ នៅរសៀលថ្ងៃទី២ មិថុនា ដោយលោកមានប្រសាសន៍យ៉ាងខ្លីថា ជាប់រវល់ការងារមមាញឹកច្រើន។
ទោះបីជាយ៉ាងនេះក្ដី នាយករដ្ឋបាលសាលាខេត្តបន្ទាយមានជ័យ លោក ឈឿង ក្រៃយ៉ុង មានប្រសាសន៍ថា លោកត្រៀមកោះហៅបណ្ដាញអ្នករត់តាក់ស៊ីសន្តិភាព និងភាគីពាក់ព័ន្ធ ដើម្បីប្រជុំពិភាក្សាដោះស្រាយលើការងារនេះក្នុងពេលឆាប់ៗ៖ «ព្រោះទើបបានគោលការណ៍ឯកភាពពីអភិបាលខេត្ត។ ឥឡូវខ្ញុំកំពុងទាក់ទងពួកបណ្ដាញតាក់ស៊ីចូលរួមដោះស្រាយ»។
មន្ត្រីសម្របសម្រួលអង្គការលីកាដូ (LICADHO) ខេត្តបន្ទាយមានជ័យ លោក ភួន ឈិន មានប្រសាសន៍ថា ការធ្វើបាតុកម្មដោយសន្តិវិធី បើទោះជាអាជ្ញាធរអនុញ្ញាត ឬមិនអនុញ្ញាតក្ដី គឺពលរដ្ឋគ្រប់រូបអាចធ្វើទៅបាន គ្រាន់តែជូនដំណឹងជាមុនទៅអាជ្ញាធរខេត្ត-រាជធានី ដោយបញ្ជាក់ពីគោលបំណងនៃការធ្វើបាតុកម្មនោះ។
លោកថា បាតុកម្មដោយសន្តិវិធីនេះ គឺមានធានាក្នុងរដ្ឋធម្មនុញ្ញរបស់កម្ពុជានិងមានចែងក្នុងច្បាប់ ស្ដីពីការធ្វើបាតុកម្មដោយសន្តិវិធីទៀត។ អ៊ីចឹង ប្រសិនជាប្រជាពលរដ្ឋទូទៅគាត់មានបញ្ហាដែលត្រូវការទាមទារឲ្យ អាជ្ញាធរដោះស្រាយជូនពួកគាត់ ហើយគាត់ជ្រើសរើសយកវិធីសាស្ត្របាតុកម្មនេះ គឺគាត់អាចធ្វើទៅបាន។
ទោះជាយ៉ាងណាប្រធានក្រុមបណ្ដាញអ្នករត់តាក់ស៊ីសន្តិភាព ឲ្យដឹងថា មន្ត្រីសាលាខេត្តមិនបានអនុញ្ញាតច្បាប់ឲ្យពួកគាត់ធ្វើបាតុកម្មនោះ ទេ ក៏ប៉ុន្តែបានប្រថាប់ត្រា និងទទួលលិខិតស្នើសុំនេះ។ នៅក្នុងលិខិតស្នើសុំបញ្ជាក់ថា គម្រោងធ្វើបាតុកម្មនេះមានរយៈពេល ៣ថ្ងៃ គឺចាប់ពីថ្ងៃទី៦ ដល់ថ្ងៃទី៨ ខែមិថុនា ឆ្នាំ២០១៦ និងមានរថយន្តប្រមាណ ៥០គ្រឿង តវ៉ាតាមដងផ្លូវចំនួន ៣ចំណុច គឺនៅប៉ុស្តិ៍គយត្រួតទំនិញភូមិកូនដំរី សង្កាត់និមិត្ត ក្រុងប៉ោយប៉ែត ប៉ុស្តិ៍គយសាលាក្រហម ស្រុកអូរជ្រៅ និងប៉ុស្តិ៍គយចល័តក្បែរមន្ទីរសាធារណការ និងដឹកជញ្ជូនខេត្តបន្ទាយមានជ័យ៕
ចំនួនអ្នកទស្សនា
- ថ្ងៃនេះ2171
- ម្សិលមិញ14181
- សប្តាហ៍នេះ2171
- ខែនេះ117321
- ឆ្នាំនេះ117321
- សរុប20559777